Ní ainmnítear ar an teastas breithe aithreacha nach bhfuil pósta ar mháithreacha a leanaí agus d'fhéadfadh sé gur ghá dóibh tuismithíocht a chruthú d'fhonn cur isteach ar chaomhnóireacht, cúram nó rochtain ar a leanaí.
Leanaí tuismitheoirí nach bhfuil pósta ar a chéile, d'fhéadfadh sé gur ghá dóibh tuismithíocht a chruthú d'fhonn a gcothabháil nó a dteidlíochtaí oidhreachtaí a fháil.
Má admhaíonn athair tuismithíocht, féadann sé a aontú go gcuirfear a ainm leis an teastas breithe.
Cad a tharlaíonn nuair a bhíonn díospóid tuismithíochta ann?
Nuair a bhíonn díospóid tuismithíochta ann, féadann an chúirt a ordú go dtéann páirtithe an cháis faoi thástáil tuismithíochta sular féidir ordú a dhéanamh. Má ordaíonn an chúirt tástáil a dhéanamh, féadann sé a threorú fosta cé atá le híoc as costas na tástála. Féadann an mháthair nó an t-athair líomhnaithe é a íoc nó d'fhéadfaí na costais a chomhroinnt. Ní cuid den chóras sláinte phoiblí í an tástáil tuismithíochta agus níl aon chiste cúirte ann as ar féidir na costais tástála a íoc.
Is taobh amuigh den Stát a dhéantar tástáil tuismithíochta d'Éirinn. Féadann tú féin teagmháil a dhéanamh leis an tsaotharlann (iarrfar ort dochtúir teaghlaigh a roghnú chun na tástálacha a dhéanamh), nó is féidir dul chuig ceann de na gníomhaireachtaí sainiúla in Éirinn a eagróidh tástáil duit.
Dearbhú tuismithíochta
Féadann duine ordú a iarraidh sa Chúirt Chuarda gurb é/í a m(h)áthair nó a (h)athair duine éigin. Is féidir é seo a dhéanamh fiú má tá an tuismitheoir marbh.
Conas iarratas a dhéanamh
Is féidir aturnae a fhostú chun iarratas a dhéanamh ar do shon nó féadann tú féin an t-iarratas a dhéanamh. B'fhéidir go mbeifeá i dteideal cúnamh dlí.
Má roghnaíonn tú gan aturnae a fhostú, beidh ort teagmháil a dhéanamh le hoifig na Cúirte Cuarda i do chontae nó oifig na Cúirte Dúiche sa cheantar ina gcónaíonn tú. Beidh ort na foirmeacha cuí cúirte a thaisceadh in oifig na cúirte. Cuirfidh foireann na cúirte in iúl duit cé na foirmeacha atá de dhíth ort chun d'iarratas a dhéanamh ach ní féidir leo a rá leat cad atá le cur ar na foirmeacha. Nuair a bheidh an fhoirm/na foirmeacha cuí comhlánaithe agat, ní mór duit a iarraidh go liostófar d'iarratas os comhair na cúirte. Ní mór duit fosta teacht i láthair na cúirte ar an lá chun d'iarratas a dhéanamh.
Foirmeacha cúirte
Cúirt Dúiche: S.I. Uimh. 93 de 1997: Rialacha Cuírt Dúiche 1997
Foirm 61.1: Fógra iarratais um threoir chun tástálacha fola a úsáid - An tAcht um Stádas Leanaí 1987 alt 38(1)
Foirm 61.4: Fógra rúin finné a ghlaoch - An tAcht um Stádas Leanaí, 1987
Cúirt Chuarda: I.R. Uimh. 510 Rialacha Cúirt Cuarda, 2001
Foirm 37H: Fógra Rúin chun sampla fola a thógáil
Foirm 37J: Fógra Rúin chun an duine ar tástáladh tástálacha fola faoina stiúir srl. a ghlaoch mar fhinné.
Reachtaíocht ábhartha
An tAcht um Stádas Leanaí, 1987
I.R. Uimh. 215 de 1988 - Rialacháin Tástálacha Fola (Tuismíocht), 1988
Rialacha cúirte
I.R. Uimh. 93 de 1997: Rialacha Cúirt Dúiche, 1997: Ordú 61
I.R. Uimh.. 501 de 2001: Rialacha Cúirt Chuarda, 2001
I.R. Uimh. 312 de 2007: Rialacha Cúirt Chuarda (Ginearálta) 2007