1. San Ordú seo ciallaíonn ‘‘an tAcht’’ an Life Assurance Companies (Payment into Court) Act, 1896.

2. Cuideachta árachais ar mian léi íocaíocht a dhéanamh isteach sa Chúirt faoin Acht, cuirfidh sí faoi deara, trína rúnaí, nó trí oifigeach údaraithe eile, mionnscríbhinn a chomhdú dar teideal ‘‘Maidir le Polasaí Uimh. ..... a cuireadh i gcrích le (tabhair ainm na cuideachta anseo)’’ agus maidir leis an Acht, agus ina leagfar amach:

(a) gearrthuairisc ar an bpolasaí agus ráiteas i dtaobh na ndaoine a mbeidh teideal acu faoi, de réir théarmaí an pholasaí, maille le hainmneacha agus seoltaí na ndaoine sin, a mhéid is eol iad don chuideachta;

(b) ráiteas gairid i dtaobh na bhfógraí a bheidh faighte ag an gcuideachta lena mbeidh leas á éileamh san airgead a bheidh faoi árachas, nó teideal á éileamh chuige, na dátaí ar a mbeifear tar éis na fógraí sin a fháil, dátaí tarraingthe siar cibé fógraí (más ann) a bheifear tar éis a tharraingt siar, agus ainmneacha, agus, ach amháin i dtaca le fógraí a bheidh tarraingthe siar, seoltaí, a mhéid is eol don chuideachta iad, na ndaoine a bheidh tar éis na fógraí sin a thabhairt;

(c) ráiteas á rá, i dtuairim bhord stiúrthóirí na cuideachta, nach féidir aon leor-urscaoileadh a fháil ach trí íocaíocht a dhéanamh isteach sa Chúirt faoin Acht;

(d) an chuideachta a bheith sásta cibé suim bhreise (más ann), cibé acu is le haghaidh úis nó eile í, a ordóidh an Chúirt a íoc isteach sa Chúirt, agus aon chostais a íoc a mheasfaidh an Cúirt, in imthosca an cháis, ba chóir don chuideachta a íoc;

(e) gealltanas ón gcuideachta go dtarchuirfidh sí, láithreach, chuig an gCuntasóir aon fhógra éilimh a gheobhaidh an chuideachta tar éis an mhionnscríbhinn a dhéanamh, maille le litir ina dtagrófar do theideal na mionnscríbhinne;

(f) an áit ina bhféadfar aon toghairm, ordú, nó fógra faoi aon imeachtaí a bhainfidh leis an airgead a sheirbheáil ar an gcuideachta.

3. Cuirfear i gceangal leis an mionnscríbhinn sceideal taiscí san fhoirm chlóite chéanna le sceideal na dtaiscí a ghabhann le hordú, ina luafar teideal agus seoladh na cuideachta, méid an airgid a bheidh beartaithe a thaisceadh, agus an creidmheas mórleabhair a mbeidh an t-airgead sin le cur chuige.

4. Ní asbhainfidh an chuideachta aon chostais nó caiteachais a bhainfidh nó a ghabhfaidh leis an íocaíocht isteach sa Chúirt.

5. Ní dhéanfar aon íocaíocht isteach sa Chúirt faoin Acht i gcás ina mbeidh aon chaingean a mbeidh an chuideachta ina páirtí inti ar feitheamh i ndáil leis an bpolasaí nó leis an airgead a bheidh árachaithe leis sin, ach amháin le cead ón gCúirt a bheidh le fáil sa chaingean.

6. Tabharfaidh an chuideachta fógra faoin íocaíocht sin láithreach, leis an bpost, do na daoine uile agus faoi seach a dhealróidh ón mionnscríbhinn a bheith i dteideal an airgid, nó a dhealróidh ón mionnscríbhinn leas a bheith acu san airgead, a bheidh árachaithe agus íoctha isteach sa Chúirt, nó fógra éilimh a bheith tugtha acu don chuideachta, ach amháin i gcás ina mbeidh an fógra tarraingthe siar, agus ach amháin a mhéid nach eol don chuideachta ainm nó seoladh aon duine den sórt sin.

7. Féadfaidh aon duine a bheidh á éileamh é a bheith i dteideal an airgid a bheidh íoctha isteach sa Chúirt, nó á éileamh leas a bheith aige ann, iarratas a dhéanamh ina leith sin le toghairm speisialta.

8. Mura n-ordóidh an Chúirt a mhalairt, ní dhéanfaidh an t-iarratasóir, ach amháin nuair a bheidh sé ag iarraidh go n-íocfaidh an chuideachta suim bhreise chostas, an toghairm sin a sheirbheáil ar an gcuideachta, ach seirbheálfaidh sé í ar gach duine, nó tabharfaidh sé fógra fúithi do gach duine, a dhealróidh, ón mionnscríbhinn ar a mbeifear tar éis íocaíocht a dhéanamh isteach sa Chúirt, a bheith i dteideal an airgid, nó leas a bheith aige ann nó éileamh a bheith aige air, agus do gach duine a mbeidh aon fhógra breise tugtha aige a bheifear tar éis a tharchur chuig an gCuntasóir mar a dúradh.

9. Is é seo a leanas an teideal a chuirfear ar an gcreidmheas mórleabhair a gcuirfear an t-airgead a thaiscfear faoin Ordú seo chuige:‘‘Maidir le Polasaí Uimh. ... ar shaol A.B. arna thógáil amach le Cuideachta .....’’

10. Déanfar cóip fhianaithe den sceideal a bheidh i gceangal leis an mionnscríbhinn a luaitear i riail 2 a fhágáil ag an gCuntasóir.

11. Ar an gCuntasóir d’fháil aon fhógra éilimh ina dhiaidh sin arna tharchur ag an gcuideachta sin de bhun an ghealltanais uathu dá dtagraítear i riail 2, coinneoidh sé an fógra sin agus taifeadfaidh sé ina leabhair é; agus ar aon deimhniú, nó cóip de chuntas ar an gciste lena mbainfidh an fógra sin, nótálfaidh sé ainm an duine a mbeidh an fógra sin á thabhairt aige, maille le dáta an fhógra.