Cúlra:
Síníodh an tAcht um Chinnteoireacht Chuidithe (Cumas), 2015 ina dhlí ar 30 Nollaig 2015. Baineann an tAcht le tacú le cinnteoireacht agus le méadú a dhéanamh ar chumas duine cinntí a dhéanamh.
Shínigh an tUachtarán an tAcht um Chinnteoireacht Chuidithe (Cumas) (Leasú) 2022 ina dhlí ar 17 Nollaig 2022. Bhí gá leis an reachtaíocht leasaitheach seo chun tús iomlán a chur le hAcht 2015 agus chun próisis a shruthlíniú agus cosaintí a fheabhsú.
Cad a dhéanann an tAcht?
Cruthaíonn Acht 2015 athruithe tábhachtacha do dhaoine a bhféadfadh tacaíocht a bheith ag teastáil uathu chun cinntí a dhéanamh. Is féidir leis na cinntí seo a bheith mar gheall ar a leas pearsanta, a sláinte, a gcúram sóisialta, agus a maoin agus a ngnóthaí.
Cuireann an tAcht deireadh leis an gcóras coimircíochta reatha agus ceanglaíonn sé go scaoilfear gach barda cúirte aosach as coimircíocht laistigh de thrí bliana ó thosach feidhme an Achta. Tugtar isteach leis córas srathach tacaíochta cinnteoireachta do dhaoine a dteastaíonn cabhair uathu chun cinntí a dhéanamh.
Glactar leis san Acht go bhfuil sé de chumas ag gach duine fásta cinntí a dhéanamh, mura gcinntear a mhalairt. Tugtar isteach leis treoirphrionsabail nua maidir le hidirghníomhú le duine a bhfuil deacrachtaí aige lena gcumas cinnteoireachta agus bunaítear an tSeirbhís Tacaíochta Cinntí (DSS).
Déantar foráil san Acht maidir leis an méid seo a leanas:
- ceart an duine aonair chun neamhspleáchas agus féinchinntiúchán a urramú
- creat dlíthiúil atá comhlíontach ó thaobh chearta an duine de le haghaidh cinnteoireachta i gcás nach bhfuil cumas ag duine agus chun treoracha maidir le cúram sláinte a chur chun cinn
- soiléireacht dhlíthiúil maidir le cé atá in ann cinntí atá comhlíontach ó thaobh dlí a dhéanamh do dhuine nach bhfuil cumas acu
- cinnteoirí a aithnítear de réir dlí chun tacú le duine a gcumhachtaí cinnteoireachta a uasmhéadú
- maoirseacht fheabhsaithe ar an bpróiseas Cumhachtaí Aturnae Seasmhacha