1. Na Rialacha Cúirte Dúiche (An tAcht um Cheartas Coiriúil (Leasú) 2009) 2010 is teideal do na Rialacha seo.

2. Tiocfaidh na rialacha seo i ngníomh an 1ú lá de Mhárta 2010 agus forléireofar iad i dteannta na Rialacha Cúirte Dúiche eile go léir ó 1997 go 2010.

3. Leasaítear na Rialacha Cúirte Dúiche 1997 (I.R. Uimh. 93 de 1997):

...

​(v) tríd an riail seo a leanas a chur in ionad riail 2 d’Ordú 18:

“†2. Ní dhéanfar aon duine a bheidh cúisithe in aon cheann de na cionta seo a leanas a ligean faoi bhannaí ach amháin le hordú ón Ard-Chúirt:

(a) tréas,

(b) cion faoi alt 2 agus 3 den Acht Tréasa 1939,

(c) cion faoi alt 6, 7 agus 8 den Acht um Chiontaí in Aghaidh an Stáit 1939,

(d) sárú tromchúiseach den saghas dá dtagraítear in alt 3(1)(i) den Acht um Choinbhinsiúin na Ginéive 1962,

(e) cion faoi alt 9 den Acht um Rúin Oifigiúla 1963, nó cion faoi Chuid II den Acht sin a rinneadh ar dhóigh ba dhochar do shlándáil nó caomhnú an Stáit,

(f) dúnmharú, iarracht ar dhúnmharú, comhcheilg um dhúnmharú nó píoráideacht, lena n-áirítear cúlpháirtí roimh an ngníomh nó i ndiaidh an ghnímh,

(g) cion faoi alt 3, arna leasú, den Acht um Choinbhinsiúin na Ginéive 1962 nó cion faoi alt 7 nó 8 den Acht um an gCúirt Choiriúil Idirnáisiúnta 2006,

(h) cion faoin Acht um Cheartas Coiriúil (Coinbhinsiún na Náisiún Aontaithe in aghaidh Céastóireachta) 2000,

(i) cion dúnmharaithe faoi alt 2 den Acht um Cheartas Coiriúil (Sábháilteacht Oibrithe na Náisiún Aontaithe), 2000, nó iarracht nó comhcheilg an cion sin a dhéanamh,

(j) cion arb éard é marú nó iarracht ar mharú faoi mhír (h) nó (j) d’alt 2(1) den Acht um Shlándáil Mhuirí 2004,

(k) cion dúnmharaithe faoi alt 6 nó 11 den Acht um Cheartas Coiriúil (Cionta Sceimhlitheoireachta) 2005, nó iarracht cion den sórt sin a dhéanamh,

(l) cion faoi alt 71, 71A, 72 nó 73 den Acht um Cheartas Coiriúil 2006.”;