Clár ábhair
Breithiúnas ón gCúirt Dúiche a chur ar ceal
Is féidir leat iarratas a dhéanamh chuig an gCúirt Dúiche (sa cheantar cúirte ina bhfuarthas an breithiúnas mainneachtana) ar ordú chun an breithiúnas a athrú nó a chur ar ceal.
Chun é sin a dhéanamh, ní mór duit Fógra Foriarratais (Foirm 44.02) comhlánaithe, agus cóip de, a chur faoi bhráid oifig na cúirte inar próiseáladh an breithiúnas. Tugtar cur isteach d’fhoriarratais air seo.
Sa Fhógra Foriarratais, ní mór duit:
- Leagan amach go soiléir agus go hachomair na cúiseanna nár chuir tú foirm Láithris isteach agus nár sheirbheáil tú foirm Láithris agus Cosanta.
- Cineál na calaoise, na mífhaisnéise, an iontais, na hearráide nó aon fhoras leordhóthanach eile ar a bhfuil d’iarratas bunaithe a lua.
- Leagan amach go soiléir agus go hachomair do chosaint ar na héilimh sa Fhógra Éilimh, agus a lua cé na héilimh a admhaíonn tú, nach n-admhaíonn tú, nó a dhiúltaíonn tú, lena n-áirítear na cúiseanna.
Ba chóir duit Mionnscríbhinn faoi mhionn a chur isteach leis an bhFógra Foriarratais freisin, ina luaitear na fíricí ábhartha uile atá beartaithe agat a úsáid sa chúirt. Ní mór táillí cúirte a íoc don dá dhoiciméad.
Eiseoidh oifig na cúirte an Fógra Foriarratais le dáta éisteachta agus seolfaidh sí cóip ar ais chugat. Ní mór duit ansin cóip den Fhógra Foriarratais agus den Mhionnscríbhinn a sheirbheáil ar an éilitheoir. Chun tuilleadh eolais a fháil maidir le seirbheáil agus cruthúnas seirbheála, féach ar ár leathanach Seirbheáil agus Cruthúnas Seirbheála.
Más mian leat bac a chur ar imeachtaí, ní mór duit méid iomlán an bhreithiúnais (an fiachas móide costais) a thaisceadh in oifig na cúirte.
Ag an éisteacht, féadfaidh an breitheamh an breithiúnas a athrú nó a chur ar ceal. Féadfaidh siad cinneadh a dhéanamh freisin maidir le costais, airgead a íocadh leis an gcúirt, nó aon ordú eile a mheasann an chúirt a bheith cuí.
Tabhair faoi deara: Má mhainníonn ceachtar páirtí ordú cúirte a chomhlíonadh, féadfaidh an breitheamh an cás a dhíbhe nó cosaint nó frithéileamh a scriosadh amach. Féadfaidh an breitheamh ansin breithiúnas a thabhairt nó ordú a dhéanamh (lena n-áirítear maidir le costais).
Breithiúnas ón gCúirt Chuarda a chur ar ceal
Is féidir leat iarratas a dhéanamh chuig an gCúirt Chuarda (sa chuaird inar tugadh an breithiúnas mainneachtana) ar ordú chun an breithiúnas a athrú nó a chur ar ceal. Ní mór é seo a dhéanamh tráth nach déanaí ná 10 lá tar éis duit a bheith ar an eolas faoin mbreithiúnas.
Chun é seo a dhéanamh, cuir isteach Fógra Foriarratais (Foirm 13) comhlánaithe agus cóip chuig oifig na cúirte.
Sa Fhógra Foriarratais, ní mór duit:
- A leagan amach cén fáth nár sheirbheáil tú foirm Iontrála Láithris nó Foirm Chosanta.
- Na forais dhlíthiúla ar a bhfuil tú ag brath a lua (calaois, mífhaisnéis, iontas, earráid, srl.).
- Do chosaint ar an éileamh sa Bhille Sibhialta a leagan amach agus a lua cé na héilimh a admhaíonn tú, nach n-admhaíonn tú, nó a dhiúltaíonn tú, agus cén fáth.
Ba chóir duit Mionnscríbhinn faoi mhionn a chur isteach leis an bhFógra Foriarratais. Baineann táillí cúirte leis an dá dhoiciméad.
Eiseoidh oifig na cúirte an Fógra le dáta éisteachta agus seolfaidh sí cóip ar ais chugat. Ní mór duit ansin an Fógra agus an Mhionnscríbhinn a sheirbheáil ar an éilitheoir. Ní chuirfidh seirbheáil stop le himeachtaí mura n-ordaíonn an chúirt a mhalairt.
Ag an éisteacht, féadfaidh an breitheamh treoracha a thabhairt maidir le méid an bhreithiúnais, costais, nó orduithe eile. Féadfaidh siad an breithiúnas a athrú nó a chur ar ceal freisin.
Breithiúnas ón Ard-Chúirt a chur ar ceal
Is féidir leat iarratas a dhéanamh chuig Máistir nó Leas-Mháistir na hArd-Chúirte ar ordú chun breithiúnas mainneachtana a athrú nó a chur ar ceal.
Chun é seo a dhéanamh, cuir isteach Fógra Foriarratais comhlánaithe agus cóip chuig Príomh-Oifig na hArd-Chúirte.
Sa Fhógra Foriarratais, ní mór duit:
- A mhíniú cén fáth nár chuir tú isteach nó nár sheirbheáil tú Meabhrán Iontrála Láithris nó Foirm Chosanta.
- Na forais dhlíthiúla ar a bhfuil tú ag brath a lua.
- Do chosaint ar an Toghairm Achomair a leagan amach.
Ní mór duit Mionnscríbhinn faoi mhionn a chur isteach leis an bhFógra Foriarratais freisin.
Eiseoidh oifig na cúirte an foriarratas le dáta éisteachta agus seolfaidh sí cóip ar ais chugat. Ní mór duit ansin an Fógra agus an Mhionnscríbhinn a sheirbheáil ar an éilitheoir. Féach Seirbheáil agus Cruthúnas Seirbheála le haghaidh tuilleadh eolais.
Ar dháta na héisteachta, féadfaidh an Máistir/Leas-Mháistir an breithiúnas a athrú nó a chur ar ceal, nó orduithe eile a eisiúint. Féadfaidh siad treoracha a thabhairt maidir le méid an fhiachais nó costais. Ní reáchtálfar an éisteacht go dtí go gcomhlíontar treoracha na cúirte, mura gcinneann an chúirt a mhalairt.
Breithiúnas ón Ard-Chúirt ón Máistir/Leas-Mháistir a chur ar ceal
Is féidir leat iarratas a dhéanamh freisin chuig breitheamh den Ard-Chúirt chun breithiúnas mainneachtana a dheonaigh an Máistir/Leas-Mháistir a chur ar ceal.
Chun é seo a dhéanamh, cuir isteach Fógra Foriarratais agus cóip chuig Príomh-Oifig na hArd-Chúirte laistigh de 6 lá ón uair a cuireadh an t-ordú i gcrích.
Sa Fhógra Foriarratais, ní mór duit:
- Na forais dhlíthiúla le haghaidh achomhairc a lua.
- Do chosaint ar an Toghairm Achomair a leagan amach.
- Cóip den bhreithiúnas nó ordú atá á achomharc a chur san áireamh.
Ní mór duit Mionnscríbhinn faoi mhionn a chur isteach leis an bhforiarratas freisin. Baineann táillí leis.
Eiseoidh oifig na cúirte an foriarratas agus seolfaidh sí ar ais é le dáta éisteachta. Ní mór duit ansin an Fógra agus an Mhionnscríbhinn a sheirbheáil ar an éilitheoir.
Táillí cúirte
- An Chúirt Dúiche: Fógra Foriarratais: €15, Mionnscríbhinn: €15
- An Chúirt Chuarda: Fógra Foriarratais: €60, Mionnscríbhinn: €15
- An Ard-Chúirt: Fógra Foriarratais: €60, Mionnscríbhinn: €20
Is féidir táillí cúirte a íoc le cárta nó le hairgead tirim ag d’oifig chúirte áitiúil nó (i mBaile Átha Cliath) ag an Oifig Stampála i gcoimpléasc na gCeithre Cúirteanna.
Le haghaidh tacaíochtaí agus teagmhálacha úsáideacha a bhaineann leis an dlí sibhialta, tabhair cuairt ar ár leathanach Seirbhísí Tacaíochta.
