Baile
As BéarlaAs Gaeilge
Cuardaigh le haghaidh Cliceáil chun Cuardach a dhéanamh
Ard-Chuardach
Leagan Inphriontáilte
Na Ranna go LéirTreoracha CleachtaisRialacha Cúirte Téarmaí & Suíonna
Dialann Dlí Oifigí & LéarscáileannaBreithiúnais & Cinntí

Rialacha na Cúirte Cuarda

Ordú: 19

Iarratais taoibhe

1. Ar na doiciméid chuí a thaisceadh agus na táillí forordaithe a íoc, féadfar iarratas a dhéanamh san Oifig de réir Fhoirm 26 de Sceideal na bhFoirmeacha atá i gceangal leis na hOrduithe seo i leith na nithe seo a leanas, agus féadfaidh an Cláraitheoir Contae orduithe a dhéanamh ar an gcéanna:—
      (i) chun caomhnóir ad litem a cheapadh ar naíon, nó ar dhuine mímheabhrach nár breithníodh ina dhuine mímheabhrach;

      (ii) chun go rachaidh gearánaí, ba mhionaoiseach le déanaí, ar aghaidh ina ainm féin;

      (iii) chun dul ar aghaidh, d'ainneoin páirtí a bheith tar éis bháis, ar a cheart a bheith ar marthain;

      (iv) chun ordú coinníollach a dhaingniú ar dheimhniú nár suíodh aon chúis;

      (v) chun a mheas gur seirbheáil leormhaith í seirbheáil Bille Shibhialta nó doiciméid tionscnaimh eile faoi Ordú 11, Riail 13;

      (vi) chun a cheadú Bille Sibhialta nó doiciméad tionscnaimh eile a sheirbheáil lasmuigh den dlínse, de bhun Ordú 13;

      (vii) chun airgead a bheidh taiscthe chun creidmheasa mionaoisigh a íoc amach as an gCúirt ar é do theacht i lán-aois;

      (viii) chun earráidí cléireachais nó earráidí in ainmneacha páirtithe in aon imeachtaí a cheartú, cibé acu is le toiliú a cheartaítear iad nó nach ea, ach sin faoi réir athsheirbheáil a dhéanamh nuair nach le toiliú a cheartaítear iad;

      (ix) chun Bille Sibhialta nó doiciméad tionscnaimh eile a athnuachan, dá bhforáiltear in Ordú 12 de na Rialacha seo;

      (x) chun dul ar aghaidh i gcoinne cosantóra, ba naíon le déanaí, ar aois iomlán a bheith slánaithe aige nó aici;

      (xi) chun dul ar aghaidh trí Ard-Aighne nua nó ina choinne nó ina coinne;

      (xii) go soláthróidh páirtí cíosrolla;

      (xiii) go n-íocfaidh tionóntaí a gcíosanna le glacadóir, le forghabhálaí, le caomhnóir nó le riarthóir pendente lite;

      (xiv) go ndéanfaidh daoine atá i bhfiacha ag eastát pearsanta na suimeanna atá dlite díobh a íoc le glacadóir nó le riarthóir pendente lite;

      (xv) ar urghaire do Shirriam chun ceannaitheoir a chur i seilbh i gcás Cláraitheora Contae a bheidh sannta do na hoifigí Cúirte Cuarda do chontaetha Bhaile Átha Cliath agus Chorcaí;

      (xvi) ar urghaire do Shirriam chun tionónta a chur i seilbh i gcás Cláraitheora Contae a bheidh sannta do na hoifigí Cúirte Cuarda do chontaetha Bhaile Átha Cliath agus Chorcaí;

      (xvii) chun díol a dhaingniú go hiomlán;

      (xviii) chun toiliú a ghlacadh agus Riail Chúirte a dhéanamh de i gcás na páirtithe a bheith sui juris;

      (xix) chun ordú coinníollach a dhaingniú ar dheimhniú nár suíodh aon chúis, agus chun ordú a dhéanamh á ordú cibé costais (más ann) a forchoimeádadh tráth déanta an ordaithe choinníollaigh a íoc;

      (xx) ar bhreithiúnas eisealbhaithe ar shéanadh;

      (xxi) chun dul ar aghaidh, comhréiteach as an áireamh.